iPhone 16 Pro 從首賣日用到依家接近一年，係時候畀個長期使用嘅評價。先講失望嘅地方，首先個 5X 長焦鏡嘅表現的確係不太理想，暗少少已經會冇曬細節，而且 5X 亦已經係最大可用焦距，再上的話就算係睇縮圖都會睇到劣化，但如果先用 5X 影再裁剪，觀感上就會冇咁差。而且電池續航力亦係偏弱，從100% 用到 20% 嘅著mon 時間大概得 6 小時左右，以2024 年標準來講已經不算理想。至於 Apple Intelligence 功能？算把啦，除咗通知摘要功能比較實用之外（慳到少少時間唔使撳入 email 度），其他功能都係做得唔太好，例如消除圖片物件，Photoshop 入面果個功能大概比 iOS 果個有用 5~10 倍吧。

好多人都批評 iPhone 16 系列加入嘅「相機掣」十分雞肋，但我反而幾鍾意。雖然佢觸發力度比較大，用作快門掣會好容易手震令相片模糊，但可以令我喺唔望螢幕嘅情況下用最快速度啟動相機，捕捉決定性瞬間時特別有用。其觸控滑動功能雖然難上手，但我將佢設定為曝光補償控制後，我覺得用落同傳統相機嘅功能滾輪差唔多，整體嚟講都係十分實用。

而超廣角相機嘅升級亦係十分有感。我用 iPhone 16 Pro 之前係用 iPhone 11 Pro，整體而言係從「不可用」提升到「好用」，就算喺夜晚，依個升級到 4800萬像素嘅超廣角鏡頭都能影到唔差嘅相片。雖然同 1x 主鏡頭相比仍然有差距，但喺晚間嘅表現已經比 5x 遠攝鏡更好。作為微距鏡的話，效果 OK，但同時間 1x 鏡頭嘅對焦距離亦遠咗好多，如果想用 1x 鏡頭近拍，好多時要調到 1.5x 甚至 2x 先唔會自動轉做超廣角鏡。

講起 iPhone 16 Pro 嘅 2x 焦距，我覺得 iPhone 嘅無損變焦（光學畫質變焦？）係所有手機嘅同類功能入面數一數二咁好。主要原因係佢可以保留相對較多嘅影像細節，而且細節位相對比較自然。我平時喜歡用 2x 焦距嚟影相，而 16 Pro 嘅 2x 我覺得其表現已經可以完全超越 11 Pro 嘅 2x 鏡頭。

iPhone 16 Pro 係第一部用金屬殼電池嘅 iPhone，可能因為電池散熱好咗，耐用程度明顯有改善。叉咗超過三百個循環，而且我亦頗常用無線叉電，理論上無線叉電更高嘅發熱量會對電池健康帶來更大負面影響，但仍然有 98% 電量，表現唔錯。

至於從 iPhone 12~15 所加入嘅各項新功能，包括拍攝 HDR 影片/相片、120hz mon 等等，可能因為已經見咗一段時間，冇曬新鮮感，所以冇咩感覺。但全螢幕幕常亮顯示功能仍然係令我覺得有啲吸引力，因為開咗之後對電量嘅影響微乎其微，喺某啲情況，例如倒數計時亦十分實用。另外增強辨識能力嘅 Face ID 亦比 iPhone 11 Pro 嘅成功率高好多。

如果我依家攞返 $9399，仍然會選擇 iPhone Pro 系列嗎？一定唔會。即使 iPhone 17 Pro 已經將部分我最不滿 16 Pro 嘅問題解決（遠攝鏡頭），但部分位置仍然有隱憂（例如電池續航力），而且 17 Pro 仲要比 16 Pro 重咗。考慮到我喜歡比較細部嘅電話，同 iPhone 16/17 Pro 接近相同尺寸嘅 Pixel 10 Pro 頗為吸引。而依個價錢亦能買到部分大折疊電話，雖然可靠性上仍然有隱憂，但新款嘅影相質素已經可以拍得住直板機，而且大折疊所展開嘅新操作體驗亦十分實用。