尋晚聽咗 Dynaudio Confidence 30 + Luxman Black Edition CENTENNIAL 組合，我覺得依套組合最大嘅優點係所有嘢都好平衡。Luxman Black Edition CENTENNIAL 係一套完整嘅系統，有串流、SACD、黑膠、合拼 amp，而且廠方要求要買就要買曬全套四部機，而喺聽過之後我亦覺得真係要全套買先係發揮到最正確嘅效果。最初部 CD 機從 Black Edition CENTENNIAL 中嘅 D-07X 換做高一級嘅 D-10X，換做 D-10X 聲音密度雖然更高，但換返去 D-07X 後，就會發現聲音會更開揚、亦更爽快，相對之下 D-10X 喺依套系統上就有少少滯。

L-509Z 合拼機用上唔少旗艦級前後級 C-10X 及 M-10X 嘅技術，推動 Confidence 30，聲音嘅細節、密度、動態及控制力都係極高水準。我曾經聽過用 Lector 前後級推 Confidence 20 嘅效果，而我覺得 L-509Z 推 Confidence 30 效果更為優勝，因為 L-509Z 聲音更為精準、細緻，將唔同錄音、唔同訊源嘅分別更清楚呈現出嚟。而且 L-509Z 嘅內置唱放亦好高質素，起碼佢播黑膠時嘅聲音密度、細節都係拍得住部 CD 機，而又可以聽到黑膠最迷人嘅從容感。

今次我坐喺比正常位置更前嘅位置，通常坐到咁前聲音都會比較衝，結像亦可能冇咁清晰，但 Confidence 30 仍然係俾到極度精確而唔會「血盤大口」的聲音定位，當然依個位置音場嘅深度感就一定會差啲，但起碼大致唔會有一聽就覺得係錯嘅感覺，可見對喇叭嘅擴散能力相當出色（Stereophile 嘅量測亦證明依點）。

如果預算比較充裕，依套的確係好出色嘅「退燒」組合。

鋼琴家八城一夫係日本爵士樂比較早期嘅代表人物，佢喺五十到六十年代活躍，吸收咗美式嘅 bebop、hard bop 元素，再加入細膩舖排與著重編曲結構嘅特性，建立咗日式爵士樂嘅風格。而佢為 Audio Lab Record 錄製嘅《Side by Side》系列係佢嘅錄音代表作，依個系列出過三隻碟，三隻都係有同一個主題：喺 side A 同 side B 用 Bösendorfer 及 Steinway 依兩款音色大相逕庭嘅鋼琴去演繹出不同嘅感覺。

喺《Side by Side 2》依隻碟入面，佢演繹嘅作品都係 Jazz Standard 作品。為咗更突出兩款鋼琴嘅特性差異，兩個 side 所配合嘅樂器都有唔同。Bösendorfer 比較柔情嘅音色就配合結他同 bass，Steinway 比較剛強嘅音色就配合 bass 同套鼓。同我自己十分喜歡嘅山本剛比較，我會覺得八城一夫會少啲山本剛喺七十年代時追求極致乾淨與極度著重觸鍵細節嘅感覺，會有返多少少即興嘅氣氛，或者從另一個角度講，如果山本剛係將每粒琴音打磨到好似銀碟般閃閃生煇，咁八城一夫嘅琴音就好似日本漆器，有光澤得嚟又唔會冰冷。

Audio Lab Record 作為日本喺七八十年代最 iconic 嘅發燒唱片公司之一，錄音質素當然係頂級水準。我依隻舊版黑膠狀態即使非完美，間中都有啲炒豆聲，但各樂器嘅質感都係非常立體、飽滿。七十年代日本音響市場嘅迅速發展，令著重錄音及製版質素嘅「發燒碟」開始出現，而爵士樂著重細節與動態嘅特性，亦令佢喺靚音響上聽會特別有優勢，加上當時日本嘅爵士樂發展迅速，亦令當時好多日本嘅「發燒碟」都係爵士樂。

雖然依啲碟成日聽會覺得悶，但有時聽吓當係「作業用 BGM」其實都係唔錯嘅選擇呢。

早前日本環球將陳慧嫻《歸來吧》推出再版黑膠，價錢亦唔貴，直接喺日本 Amazon 買都唔使 HK$300。依隻碟作為陳慧嫻最精彩嘅專輯之一，黑膠版本都十分多，除咗已經炒到天價嘅頭版黑膠之外，香港環球亦曾經多次再版，包括 ARS 黑膠、圖案膠、黃膠，但依啲版本我都未聽過。

之前買過幾隻日本環球推出嘅香港歌手黑膠，不論係印刷質素定係音質都明顯比香港環球嘅出品好一截，依隻都唔例外，封套及歌書不論係文字定係圖片都印得非常清晰，更加送埋大海報。

而音質方面，我覺得佢係走高畫質路線，同 Tidal 上嘅串流版比較，回音略為減少，聲音層次感更明顯，人聲亦更明顯，但低頻就好似含蓄咗啲，好彩聲音都唔會好似之前聽過其他港版 ARS 膠咁會薄到扁同硬。考慮到佢比 ARS 版更平，可以接受，值得入手。

近日不安與傷感嘅思緒，就用阪本龍一嘅音樂去舒緩一吓。async 依隻碟初聽時感到不明所以，因為實驗性實在太強烈。但睇住依個 2017 年喺紐約嘅現場版本，睇到佢點樣去用各種有趣嘅方式去玩唔同嘅樂器，再瞭解埋依隻碟嘅創作背景，又開始明點解佢會咁做。

async 喺佢首次患癌痊癒之後創作，專輯初段使用比較多無調性、破碎而虛無，甚至聽落有點不安嘅聲音，表達佢對生死之間嘅沈重諗法。去到後段開始，阪本龍一就開始表達佢點樣保持平靜去面對依啲嘅無常。整體而言成隻碟都係好「玄」，有啲似 Brian Eno 嘅 ambient music，但會嚟得再沈重啲，不過陪佢走完依段旅程，又會有種放鬆咗、放低咗嘅感覺。冇人嘅人生係一帆風順，面對悲哀時，消化佢，令佢唔會成為自己負累，依個係大家都要學嘅嘢。

一套真正世界級水準嘅動畫電影。有啲dark，好沈重，但其中心思想卻係要放低依啲沈重嘅悲傷與怨恨，先可以消除仇恨嘅禍根。

雖然《世外》係改編自日本小說，但將小說形象化就係依套戲製作團隊嘅功勞，我好鍾意佢個水彩畫風出嚟嘅柔和感覺，而當中嘅怪物「人鬼」雖然喺配色同設計上都好難唔令我聯想到 EVA 中嘅「使徒」，但佢個變身過程我覺得係呈現得好好，而且啲音效亦做得相當出色（依套戲嘅音效由香港專做電影音效嘅 MBS Studio 製作）。

整套戲嘅故事線長達千年，兩個鐘嘅片長啱啱好，初段嘅故事會有少少亂，去到中段先一次過解釋究竟發生咩事，我會覺得係故意為之，目的就係想觀眾感受產生心結同解開心結嘅過程，提升故事嘅張力，總體嚟講我覺得非常值得二刷。

講多少少，今次係我第一次去 Lumen Cinema 睇戲，佢嘅好處係平（$60），但同其他平價戲院（例如荔枝角 CGV) 一樣，畫面質素都麻麻，即使佢冇好似 CGV 咁，畫面因為投影機欠缺調較而出現明顯紅藍色邊嘅情況，但就算我已經坐喺對住畫面中間嘅位置，但都會見到四角明顯係暗好多，而且整體畫面都係偏暗。好彩聲音質素勉強合格，整體聲音平衡度正常，而且螢幕尺寸亦合理。

HIFIMAN 嘅旗艦級全無線藍牙耳機 Svanar Wireless 雖然已經出咗一段時間，但我一直都冇試過。直到最近佢大減價到大概一千幾蚊港紙嘅價錢，而我有個朋友又買咗返嚟，我終於有機會試嚇佢。首先依家嘅 Svanar Wireless 已經稍為修改機身物料，放棄碳纖機身，以提升藍牙信號接收能力，但其他用料都係冇分別。講規格的話，Svanar Wireless 都幾有趣，因為佢用自家嘅喜馬拉雅 R2R DAC 晶片，並且配合 Class AB 放大器推動拓樸動圈振膜，可以話係將 HIFIMAN 嘅各種看家本領都放曬入去。但有用過 HIFIMAN DAP 嘅朋友，都明白佢哋嘅用料及音質雖然一流，但使用體驗通常都…依隻都唔例外。

首先佢係冇App，但問題唔大，因為佢本身都冇太多功能，長撳耳機機身去轉換模式都冇咩難度。最大問題係連線嘅可靠性，以 LDAC 連接 ASUS Zenfone 11 Ultra，喺 16/44.1 模式下冇問題，就算離遠部機兩米左右都冇窒聲。但轉去 24/96 模式下就極度唔穩定，講緊係部電話擺喺枱上面，隔離有人經過都會出現窒聲情況，基本上係完全不可用。

音質方面，我覺得 Svanar Wireless 最大優勢係聲音密度非常高，可以同有線耳機插手指 DAC 不相伯仲。不過可能係因為單元未煲起嘅關係，聲音比較生硬，音場層次感有少少亂。喺 24/96 模式下，聲音會比較細緻，但其可靠性問題亦令依個模式實用性唔大。

如果係講整體聲音喜好的話，我會覺得自己用咗超過三年嘅第一代 Samsung Galaxy Buds Pro（換咗 SpinFit 耳膠）比較啱口味，聲音比較平順、開揚。但 Galaxy Buds Pro 只支援 AAC，令聲音細節較少。以現價$1000 左右嚟講，如果主力係喺固定環境使用，Svanar Wireless 我覺得都係可以考慮。

早前 KEF 推出咗新款主動式喇叭 Coda W，屬於佢哋嘅入門款產品。相對於 LSX II/LSX II LT 嚟講，Coda W 低音單元尺寸同箱體容積會略為大啲，令佢嘅低頻延伸更佳，而且取消咗網絡功能，但加入帶唱頭放大嘅 RCA 輸入、藍牙升級至支援 AptX Lossless，並且仍然保留 HDMI ARC、USB 音訊、光纖及同軸輸入。

喺旺角輝煌影音嘅開放式環境中試聲，兩隻喇叭之間嘅距離大概相等於 50 吋電視嘅闊度，雖然低音表現就因為欠缺後牆反射而比較弱，但中頻同高頻都係十分平順、細緻，亦唔會明顯覺得鬆散。相對於價位相若嘅 Soundbar 嚟講，Coda W 當然就唔會有環繞聲效果，但只要擺喺地櫃上面或者喇叭腳架，都足夠做到良好嘅前方包圍感，最重要係聲音會明顯開揚得多，如果係聽音樂多的話，分別就會更明顯。而且就算想要好啲嘅低音表現，Coda W 都可以加入超低音喇叭，都有一定嘅升級空間。

Felix Ayo 指揮 I Musici 嘅《韋瓦第：四季》（Vivaldi: Le Quattro Stagioni / The Four Seasons) 唔經唔覺已經買咗三個版本嘅黑膠，分別係法版 “Trésors Classiques”、日版 “Best 30” 及今年 Esoteric 推出嘅 “Esoteric Mastering” 版，法版同 “Best 30” 日版都係喺七十到八十年代推出嘅版本。依隻專輯作為《四季》其中一個最具權威嘅演繹，推出過嘅版本多不勝數，今日終於得閒一次過比較吓佢哋有咩分別。

先講結論，我最鍾意嘅係 Esoteric 版。佢聲音精緻，弦樂音色閃閃生輝，音場立體感強，背景寧靜，唱片電平較高，但有時聲音有輕微動態壓縮咗嘅感覺，不過瑕不掩瑜，其整體音質最為出色。

法版音場立體感略差，有啲「割裂感」。唱片底噪略多，而且因為電平略低令情況更明顯。高頻較 Esoteric 版少，但音色上比較貼近真弦樂，而且細節量都幾豐富，只係冇 Esoteric 版咁突出。

“Best 30” 日版介乎於 Esoteric 版及法版之間。弦樂嘅聲音有光亮感，而又冇 Esoteric 版咁閃亮，但細節比 Esoteric 版明顯含糊，甚至比法版都差少少。音場立體感略比法版好。背景底噪及電平同法版差唔多。

最近喺連登度又見到有人討論羅文，雖然討論嘅嘢係點解咁少人討論佢，但都係個好好嘅契機去聽返佢嘅作品。之前用唔貴嘅價錢買咗隻《愛的幻想》黑膠，最初只係為咗首《在我生命裡》而買，但聽曬成隻碟，就會發現成隻碟都做得好精彩同好有連貫嘅主題。

依隻碟係羅文從EMI轉投華星嘅首張專輯，成隻碟都係以夢及幻想為主題，唱法上亦稍為改用比較輕鬆、冇咁「老正」嘅唱腔。依隻碟相對之下評價唔算特別高，主要係因為除咗幾隻大熱作品之外，其他作品都冇太大傳唱度。但如果係由頭聽到尾的話，就可以感覺到佢係想先用比較 up beat 嘅歌帶出主題，再喺下一首歌透過平淡而細膩嘅曲詞去延伸主題。例如 side A 第一首歌《中國夢》帶出對中國嘅夢同幻想嘅主題後，接落嚟嘅《故鄉》就透過細膩嘅描寫去延伸佢個夢係有啲咩。整體而言雖然唔算係概念專輯，因為其結構都係有啲鬆散，但都仍然搵到共同主題。

《愛的幻想》全碟都係喺日本製作，但可惜其音質與同期其他華星嘅唱片一樣，音質都不太理想，聲音不太通透，有啲可惜。成隻碟我最鐘意嘅係點題作《愛的幻想》，編曲編得好好聽，啲雀仔聲同結他獨奏令到成隻歌充滿住鳥語花香嘅 vibe，加上羅文果把特登放輕而帶點嬌嗲嘅唱腔，好舒服。

音響房果邊一直都係用緊由夾租朋友買嘅 Dyson 冷暖空氣清新機，但最近佢就攞返屋企用，所以我就要買返部頂上。本身諗住買返淨空氣清新機用算，畢竟個暖風功能近年都十分少用，而且 Dyson 不論係作為空氣清新機定係風扇都係有點雞肋。但考慮到依間房有時嘅濕度都會比較高，亦唔係時時都係合適開冷氣抽濕，所以就諗住買空氣清新 + 抽濕二合一機。

作為 Panasonic fans，首選其實都係 Panasonic，畢竟佢嘅空氣清新機用咗接近兩年都十分滿意。但抽濕機我又鍾情三菱電機，因為屋企果部用咗廿年仍然穩打穩紮。不過實際上我要concern 嘅嘢都幾多，首先三菱電機果部就要踢走先，因為太大部，而且佢並非使用 HEPA 濾網。要相對細部又有 HEPA 濾網，都仲有惠而浦同 LG 揀，但惠而浦抽濕機嘅負評實在多得太緊要，而 LG 就要另買 HEPA 濾網，同時睇返消委會嘅評測，Panasonic 同級產品嘅空氣過濾能力係強過 LG 好多，所以最後就揀咗 Panasonic 嘅 F-YAU21H。

本身依款喺 Panashop 嘅特價係 $3480，依個價就唔算特別吸引，但其他舖頭都係賣兩千五左右，咁的話就抵用好多。最後我喺 Build-in Pro 見到減咗 PayMe 優惠券後只係 $2489，仲有免費送貨，即刻課金。我都知 Build-in Pro 有唔少負評，但實際體驗都唔算差，佢預計 5/11 到貨，兩個工作天內送貨，實際上又真係準時嘅，雖然其他舖頭買可能有現貨，但唔急住用又冇乜所謂。

今日收貨正值落住毛毛雨，濕度升到 80% 以上，即刻就可以試埋個抽濕能力。我間房大概百零呎，對佢嚟講應該都係十分輕鬆。佢嘅抽濕效果我覺得係冇屋企果部三菱咁「暴力」，但就勝在噪音相對低啲。而且佢喺空氣清新模式下，調到低風速時同睡房果部一樣咁靜，只不過同樣會聽到 Nanoe X 離子發射器嘅高頻聲響，所以認真聆聽時都係需要熄咗佢。另一個「通病」係 LED 指示燈同樣係極度刺眼，而且無法關閉，用黑色遮光膠紙冚住，都會見到啲光喺側邊漏出嚟。但考慮到佢嘅價錢只係比純空氣清新機貴一千蚊左右，都可以接受。