Felix Ayo 指揮 I Musici 嘅《韋瓦第：四季》（Vivaldi: Le Quattro Stagioni / The Four Seasons) 唔經唔覺已經買咗三個版本嘅黑膠，分別係法版 “Trésors Classiques”、日版 “Best 30” 及今年 Esoteric 推出嘅 “Esoteric Mastering” 版，法版同 “Best 30” 日版都係喺七十到八十年代推出嘅版本。依隻專輯作為《四季》其中一個最具權威嘅演繹，推出過嘅版本多不勝數，今日終於得閒一次過比較吓佢哋有咩分別。

先講結論，我最鍾意嘅係 Esoteric 版。佢聲音精緻，弦樂音色閃閃生輝，音場立體感強，背景寧靜，唱片電平較高，但有時聲音有輕微動態壓縮咗嘅感覺，不過瑕不掩瑜，其整體音質最為出色。

法版音場立體感略差，有啲「割裂感」。唱片底噪略多，而且因為電平略低令情況更明顯。高頻較 Esoteric 版少，但音色上比較貼近真弦樂，而且細節量都幾豐富，只係冇 Esoteric 版咁突出。

“Best 30” 日版介乎於 Esoteric 版及法版之間。弦樂嘅聲音有光亮感，而又冇 Esoteric 版咁閃亮，但細節比 Esoteric 版明顯含糊，甚至比法版都差少少。音場立體感略比法版好。背景底噪及電平同法版差唔多。