時代留聲：樂壇聲影經典重現攝影展

對上一次嚟 HKDI，已經係超過十年前仲讀緊 IVE 嘅時候，當時我揀咗科 Elective 係學 Pro Tools (混音軟件），要去 HKDI 上堂，果科係我當時最愛嘅堂之一，最後嘅成績亦好好。雖然後來都冇機會再用到，但都係好開心嘅經歷。今日嚟 HKDI 係為咗參觀「時代留聲：樂壇聲影經典重現攝影展」，佢展示咗好多經典香港專輯嘅原圖及初稿，其中有啲經典封面嘅初稿相當有趣，而且啲封面嘅原圖畫質真係好靚，可以睇到好多喺成品上都睇唔清楚甚至消失咗嘅細節。

依個展覽由 B&O 贊助，佢哋亦帶咗好多經典產品嚟展示，其中包括我最愛同最想收藏，但好難搵到二手嘅 A8 耳塞，有機會可以望多兩眼都好幸福。

另一個想睇嘅係佢哋嘅黑膠圖書館，只可惜平日喺下晝兩點半時已經閂門。但望入去都見到藏品唔少，新舊碟都有，更加有質素唔錯嘅 Audio Technica 透明唱盤畀參觀者聆聽唱片，相當有心。

以前喺 HKDI 放學後間中會過對面商場間大快活食個西多士醫吓肚，今日都特登食返次回憶吓依種感覺，只不過食落去係凍嘅，就好似依段美好回憶喺我心入面嘅溫度一樣。