早前陳奕迅 FEAR and DREAMS 出咗 CD 版同上咗串流，有人就批評依隻碟音質差，但其製作總監朱祖兒就話係因為果啲人用嘅器材太差。究竟隻碟音質好唔好呢？我嘗試從音響發燒友角度出發去講兩句。我喺 TIDAL 聽依隻碟嘅 24bit/96kHz 高畫質無損版本，用嘅喇叭係 ATC SCM20ASL Pro (香港唔少錄音室都有用 ATC 嘅喇叭）。

我覺得佢嘅錄音質素以近年嘅香港歌手演唱會嚟講係 above average，主要原因係佢唔會過份動態壓縮到冇曬唔同樂器嘅動態及層次感。近年香港某啲演唱會嘅錄音啲聲會推到好大聲然後壓到好flat，淨係聽到人聲加一堆分唔開嘅樂器聲音。FEAR and DREAMS 依個現場錄音同近年其他香港演唱會錄音比較大嘅分別係佢唔會過份突出人聲部分，所以喺某啲有好多樂器共同演奏嘅部分，如果音響嘅分隔度唔夠，例如係用 Marshall 之類嘅一體式喇叭，可能會覺得人聲好暗好矇。但如果用耳機的話，應該就唔會有問題。