尋日做咗清貨師。早上見到有間二手書店話佢接收咗一批全新 CD 同黑膠擺咗喺深水埗一間夜冷舖度賣，下晝去睇就發現全部都係星娛樂嘅存貨，數量非常驚人，已經不能單純用「大貨」嚟形容。例如黎瑞恩嘅「感動」黑膠，存貨數量接近六百隻，同時亦有大量幾年前星娛樂出版嘅娛樂唱片 reissue 黑膠同SACD，亦有啲可能送畀大家都唔想要，一睇就知係死貨嘅 CD。黑膠嘅價錢從 $100 到 $300 不等，CD 就全部 $35（包括 SACD），非常抵聽。我買咗田蕊妮隻翻唱碟（$200）、光良精選碟同「啼笑姻緣」SACD，買嘅時候雖然冇得check 碟，但之後開嚟check 都係完美狀態，遲啲再聽吓分享吓聽感。

最近 AV Hospital 執笠清貨，傍晚上去八卦吓，見到有對 Blue Aura WS30i 劈到只係 $190，雖然外觀略殘，但咁嘅價錢都冇咩好講，買咗先算。院長好好人，佢話仲有對同款全新但喇叭邊爛咗嘅可以送埋畀我做替換零件。雖然依對喇叭細細對，但都十分重手。攞返去隨便駁初步試聽，完全正常，音質比預期中好。遲啲得閒再嘗試換喇叭邊先。

清貨唱片地址：深水埗汝州街144號（協興行）
AV Hospital 地址：旺角西洋菜南街 2T 號添置商業中心 16 樓