盧冠廷相隔多年再開演唱會，今次佢話會係最後一次開演唱會，但可能佢唔係偶像派啦，所以銷情都係不溫不火，慶幸今晚嘅入座率都有九成半以上。雖然佢冇偶像派嘅叫座力，但佢嘅音樂仍然喺我嘅心中有好高嘅地位，亦係間中就會想攞嚟聽嘅 comfort songs。好開心見到佢依家仍然充滿活力，唱咗接近三個鐘都 keep 到，而且聲線狀態唔錯。佢把聲有種好特別嘅魅力，不論係唱佢自己嘅歌都好，唱人哋嘅歌都好，都彷彿會加上二百分嘅感染力，令歌詞中嘅故事更加立體，而喺現場演繹中，依種特性就更加強烈。

最有驚喜嘅係佢演繹返佢喺 1977 年參加美國歌唱比賽 “The American Song Festival” 嘅作品 “Sing Till the Morning”，成隻歌真心好聽，melody 同歌詞都好入腦，而佢對 melody 嘅執著亦係佢多年嚟作品最吸引人嘅地方。隨著現代音樂愈來愈輕視 melody，盧冠廷嘅依種執著彌足珍貴。