“Mad Max: Fury Road” 嘅 4K Blu-ray 買咗一段時間，之前都係攞某幾個畫面出嚟試機多，未完整睇過成套戲，睇返先發現其實套戲嘅故事都拍得幾好。之前嘅其他 “Mad Max” 系列電影我都未睇過，但都好快代入到入面嘅世界，就係一個末世中活下去嘅故事。當然依個故事其實唔算好有深度，而且亦有啲可能係為咗舖陳其前傳 “Furiosa: A Mad Max Saga” 而有所忽略嘅細節位，例如 Furiosa 嘅身世，但佢最主要係想透過聲音同畫面將觀眾帶入依個文明崩解嘅奇幻世界，我亦覺得依個目的係好成功。

依套戲嘅 4K 碟係其中一批最早推出嘅 4K 碟之一，當時一出已經成為示範 HDR 效果嘅天碟，去到依家仍然如此，因為入面有大量光暗差距極大嘅畫面，如果你擁有頂級電視，睇依隻碟就可以令你覺得物有所值。我用最高亮度大概 1000 nits 嘅過氣高階機 Sony X9500H 嚟睇，雖然可以感受到光線嘅耀眼感，但都係睇唔到最光嘅光位細節。