《地。-關於地球的運動-》作者「魚豐」嘅新作《極速一百米。》終於喺香港上映。依套戲以短跑運動員為主題，除咗意料之內嘅熱血元素，更吸引嘅係入面不斷出現問每個角色嘅同一條問題：你為咗咩而跑？每個人嘅答案都唔同，有人想變得更強，有人想得到認同，有人想逃避現實。但我最鍾意嘅係「如果你想逃避現實，你就要面對佢。」，面對殘酷嘅現實，選擇面對佢，然後超越佢，令依個現實唔再係想逃避嘅事情，就係最好嘅解決方式。依種喺作品入面滲入哲學思想嘅做法，喺《地》入面都有出現過，而我覺得魚豐高招嘅地方，就係佢唔會令人覺得有說教嘅感覺，而係透過每個角色所做嘅事情，令人覺得依啲講法都係有根有據。

《極速一百米。》嘅畫風同場景舖排我覺得係充滿趣味。成套戲用上比較粗獷嘅線條去表達，而喺某啲場景，甚至用上有如《A-ha - Take On Me》MV 入面嘅草圖風格去凸顯滂沱大雨中比賽嘅朦朧感。同時佢亦用上好多慢動作、長鏡頭去放大角色嘅細節，對於幫助觀眾理解角色有好大幫助。整體嚟講我會覺得佢整體嘅畫風係比《地》嚟得更有趣。