在 CAS / 串流系統中，愈來愈多人認為 Switch (網絡交換器) 會對音質有影響，但我一直都唔係好信會有好大分別。本身我用緊嘅 Zyxel NR5103 5G router 所提供嘅兩個 LAN 頭，都係可以滿足我嘅需要（連接 Mac Mini 及 streamer），所以我一直都冇為系統加入 switch 嘅計劃，但隨著加入咗魅視影片播放器後，就需要多個 LAN 頭。雖然部 Mac Mini 可以用 Wi-Fi 連接，而且速度上都足夠應付串流 4K 影片，但問題係咁做會令網絡上其他 Wi-Fi 裝置變得好慢同好唔穩定，所以都係侷住要加多隻 switch。

雖然我之前唔係好信 switch 會對音質有好大分別，但之前嘅經驗令我發現喺網絡器材中使用優質電源供應對音質仍然會有正面改善，所以基本要求係要隻 switch 內置靚火牛或者可以外接靚火牛。作為精打細算玩家，我只會考慮買二手，最初有考慮過中國廠「老虎魚」（LHY Audio）嘅產品，佢哋嘅 SW-8 同 SW-6 switch 外型造工精美、內置 LPS、有 TCXO、SW-6 更內置 SFP 接口，可以配合 Lumin P1 嘅 SFP 輸入使用。依兩部嘅二手價都係一千中到兩千蚊左右，而 SW-6 全新價大概三千六蚊，二手可以話係相當抵玩，但佢哋嘅二手都相當搶手，所以有緣無份。

然後就見到 Silent Angel N8 同 NuPrime SW-8，依兩部機都係由 Thunder Data 出品，但 SW-8 採用更精美嘅機殼。佢哋都係基於 Zyxel GS-108B v3 然後加入 TCXO，並都係外置火牛。講真，一隻穩陣可靠嘅 unmanaged switch 加鐘換個靚殼賣貴啲，如果真係有用的話又唔係咩問題，更何況 GS-108 v3 其實佢做到某啲 managed switch 嘅功能，例如唔同 port 有唔同順序（QoS）及自動辨識線長去調整功率等等。只可惜 GS-108 v3 不論係全新定係二手，都似乎比 N8 及 SW-8 更難尋。而 N8 / SW-8 由於佢係行 5V，無法同部 router 共用同一個 12V LPS，變相會貴咗，令佢唔係首選。

早前睇咗荷蘭音響網站 Alpha-Audio 對於多款「音響級」及一般民用 switch 嘅測試，並發現 Netgear GS108E 由 switch 中產生嘅雜訊相當低，甚至同佢哋同時測試嘅 LHY Audio switch 非常接近，唯一缺點只係原裝火牛雜訊較高，換上輸出比較乾淨嘅火牛就能解決。依款 switch 係「簡單型」嘅 managed switch，可以做簡單嘅 flow control、QoS、手動設定 port 位速度等功能，而且佢係 12V 供電，價錢又相當便宜，最新嘅 V4 款香港賣緊 $318，上一代 V3 嘅二手價甚至只係百二蚊，睇返兩者差異，似乎係幾乎無分別，比較明顯嘅分別（慳電功能）喺 V3 升級 firmware 亦有返。所以就決定平到盡，買部二手返嚟試吓。

我本身嘅 setup 係用 Panduit UTP Cat.6 線 (1米) 駁 Mac Mini 落 router，然後用 Furutech LAN-8 NCF 由 router 駁落 Lumin P1，LPS 係用 Zero Zone 靈動版。加咗 GS108E switch 後，Mac Mini 照直入 router，router 用 Panduit UTP Cat.6 線 (0.5米) 駁 switch，然後用 Panduit UTP Cat.6A 線 (3米) 駁魅視 M9708、駁 Lumin P1 照用返LAN-8 NCF。我係特登用無屏蔽嘅 UTP 線接駁 switch 同 router，因為之前有人講過，如果 switch 端無法駁好地線，用有屏蔽嘅線駁落 router 可能會帶到 router 果邊嘅 noise 入去，繼而帶埋落部 streamer，對音質做成負面影響。電源部分我搵咗條航空頭一開二接線，再分別連接 Zero Zone 自家出品嘅鍍銀 DC 線俾 router 及 switch 用。

最初由於條 0.5米 LAN 線未到，我用咗條 Blue Jeans（Belden 代工）Cat.6A UTP 線（6呎）接駁 router 及 switch，而且亦未更新 firmware，當時大概聽咗一個鐘左右，感覺係聲音細節明顯多咗，聲音嘅微動態，即係不同弱音之間嘅變化清楚得多，但聲音有種好衝、好刺激嘅感覺，有點唔太耐聽。

兩條 DC 線煲咗兩日，今日收埋條 0.5米 LAN 線，換返上去後再升級埋 switch 嘅 firmware，開返慳電模式，坐低聽吓，嗯，幾好。之前覺得過份刺激嘅感覺少咗好多，而豐富嘅聲音細節同微動態依然存在。我試咗好多唔同類型嘅歌，最 impressing 嘅係聽王菀之嘅《Atmosphere: 霧》，依隻碟我聽過好多次，非常鍾意，亦覺得佢個錄音質素係好驚喜。其中《留白》我第一次聽到整個樂隊唔同樂器嘅演繹同 Ivana 把聲之間係可以咁有層次感同乾淨，終於唔再係炒埋一碟。而《皇后餐廳》中，我第一次清楚聽到馮翰銘喺彈鋼琴嘅過程中用咗好多吓弱音踏板所產生嘅中低頻聲響，依吓真心係覺得有啲驚訝，因為我以前聽過幾次都無留意到係有咁多次同咁清楚。

睇返 Alpha-Audio 其他測試及網上嘅評論，首先有 PoE 嘅 switch 都幾乎一定會衰聲，因為 PoE 模組會帶來嚴重干擾，令 switching noise 大增。第二係低級啲嘅 GS108 及高級啲嘅 GS108T 都冇 GS108E 咁好聲，因為 GS108E 用嘅網絡隔離模組係全金屬，GS108 係膠，而 GS108T 就有 PoE 供電輸入。五個 port 嘅 GS105E 同八個 port 嘅 GS108E 音質上無異，但由於 GS108E 不論全新及二手都比較易搵，所以都係建議優先考慮 GS108E。