最近 Spotify Lossless 終於喺香港推出，我已經冇訂 Spotify Premium 好多年，但為咗測試吓 Spotify 嘅「無損」音質係咪可以同其他串流平台嘅無損音質相同，我都特登訂返一個月試吓。考慮到電腦版嘅 Spotify 已經確定有 SRC 問題令聲音有所損失，我就使用早前加入 Spotify Lossless 支援嘅 LUMIN P1 串流音樂播放器測試。

首先播放馬友友嘅 Plays Ennio Morricone 專輯，依隻碟不論係 Spotify 定係 TIDAL 都係提供 16/44.1 無損格式，理論上係唔應該有分別。即使兩邊嘅音量都係相同，但 Spotify 聽落卻係有點奇怪，喺 TIDAL 上面，我可以聽到馬友友嘅大提琴 木腔共鳴聲係更為飽滿，後段樂團合奏時嘅音場包圍感亦更明顯。相對之下 Spotify 就令支大提琴聽落有啲「膠」。最初我都唔係好信會有咁嘅差異，後來反覆聽咗幾次，發覺依個差異雖然唔太明顯，但存在。

之後我就聽黃鶯鶯嘅《葬心》，初時聽 Spotify 嘅無損版覺得都還好，但之後聽返我從頭版 CD rip 出嚟嘅版本，真係同一隻歌嗎？整個中低頻到低頻都明顯「削」咗，尤其係大概一分鐘時出現嘅幾吓bass，喺 CD rip 上面係又深沉又有衝擊力，但去到 Spotify 上面就明顯薄弱好多。

最後就聽 Serrini 嘅新歌《掌心的女孩》，依隻歌喺 Spotify 上同樣只有 16/44.1，但喺 TIDAL 上面就有 24/48，聲音上嘅分別相當明顯。即使我已經確認我熄咗音量平衡功能，但 Spotify 嘅版本仍然係明顯比較細聲，而且更大嘅問題係 Spotify 版聽落明顯係「削」好多，甚至比《葬心》嘅情況更明顯，不但 Serrini 嘅聲線變得薄弱，連聲音嘅動態都變得扁平。

試咗幾首唔同時期、唔同類型嘅歌，考慮到Spotify 加入無損質素後音質上仍然令我失望，加上 TIDAL 嘅曲庫基本上滿足到我需要，而且月費仲要比 TIDAL 貴十蚊，一個月後我一定會 cut 咗 Spotify Premium。