今日威達尖沙咀店開始執笠大清貨，講真，最抵嘅嘢之前喺銅鑼灣度一早已經賣曬，依家賣緊嘅嘢普遍價錢同之前銅鑼灣度一樣，但都有少少漏網之魚，例如 AudioQuest NRG 1.5 8字頭電源線，用 PSC 靚銅料，規格比新款更高，1.8 米賣 $450，攞嚟畀 Bose 喇叭都可以一試。換咗條 NRG 1.5 落隻 Bose SoundTouch 20 喇叭度，之前我已經換過條 Oyaide L/i 15 EMX V2 落去，雖然配咗個一般貨色嘅英式轉美式插頭落去，但都聽到聲音嘅層次感有改善。換咗 NRG 1.5 後，首先係解決咗條線唔夠長嘅問題，第二係聲音我覺得會再清晰啲，尤其係中頻嘅清晰度。幾百蚊貨仔，OK 啦。

去完威達就去 Apple Store 試埋隻 AirPods Pro 3，唔知係未煲開定係 AAC 真係唔夠Bitrate，覺得高頻 hi-hat 位都係有少少生硬，但中頻同低頻幾好，好飽滿同比預期中層次感好。隔音真心超得，一戴落去成個世界靜曬，連人聲都隔到好多。講音質的話，如果我依家隻 Galaxy Buds Pro 有7.5 分，AirPods Pro 3 有 8分。講隔音能力的話，如果 Galaxy Buds Pro 有 4 分，AirPods Pro 有 9 分。