本身我嘅目標係想試 Wonder Audio Labs 嘅 P1 唱頭放大，但早前見到 HiFi 發燒台搞活動試聽佢哋啱啱推出嘅旗艦 Reference Phono，就抱住試聲底嘅心態試咗先。

Wonder Audio Labs 係 2022 年成立嘅中國牌子，但背後嘅其中一位話事人係香港嘅資深音響達人「威廉譚」，所以都算係半個香港牌子。佢哋嘅首款產品 P1 一推出就已經成為話題，唔單止係因為佢喺兩萬零蚊嘅價錢上落足重料，更因為佢可以畀用家以極精細嘅幅度去調整，例如唱頭阻抗從 1 ohm 到 2000 ohm 逐 ohm 作調整，如此精細嘅調較過往係十分罕見。而且因為佢係用電腦控制主機板上嘅繼電器去轉換數值，所以對音質嘅影響會比傳統方式更低。P1 經歷多次升級（Deluxe 版及分體電源）後，今年就迎來佢哋嘅旗艦級產品：Reference Phono。

相對於 P1 嚟講，Reference Phono 最主要係用料上嘅提升，包括純銀線、高級交連電容及 Lundahl 純銀升壓牛等等。但最有趣嘅分別係 Reference Phono 採用內置螢幕嘅 2.4GHz 遙控，用戶可以喺依個有螢幕嘅遙控上改動全機設定，改動後再一次過傳送到 Reference Phono 上。雖然近年都有啲唱頭放大器採用手機 app 做到類似嘅嘢，但依個豪華嘅獨立遙控睇嚟會令用家感到更有儀式感。

聲音方面，今次示範會使用 Ortofon MC 90X 唱頭，配合 Thrax Audio Yatrux 唱盤。Reference Phono 嘅聲音的確係好高水準。佢嘅聲音非常幼細，細節十分多。即使佢嘅放大線路有真空管，但「膽味」並不多，整體音色都係中性略偏清亮，大概依個就係「銀牛聲」。不過我最鍾意嘅地方係佢嘅背景十分寧靜，就算播放比較舊嘅黑膠都冇咩底噪。當然唱頭應記一功，但都要唱頭放大器本身嘅線路可以避免引入干擾先做到依個效果。

我以前未試過 P1，唔知 Reference Phono 同佢差幾遠，但睇到兩部機喺設計上有好多共同之處，相信會係音色上會有比較明顯分別。睇吓遲啲有冇機會試埋 P1 先。