噚日去咗 Post76 搞嘅 B&W Nautilus「鸚鵡螺」示範會。之前喺尖沙咀 B&W Showroom 都聽過 CH Precision 西裝推鸚鵡螺嘅效果，換成價錢相對平一截（但都唔平）嘅 Marantz 10 西裝，效果其實唔係爭好遠，最主要係聲音密度冇咁密不透風，整體嚟講我覺得依套系統都係將對鸚鵡螺推得好好。

但今次最精彩係著名錄音工程師 Leo Fung 示範 CD 同 Hi-res file 嘅分別，過往有好多人話 CAS 要玩到好貴好複雜先可以去到 CD 個級數，但今次卻證實咗只要原檔夠靚，CAS 播放 Hi-res file 不論係聲音細節、密度、動態係可以明顯比 CD 好。其實依樣嘢都唔係第一次知，十幾年前 CAS 啱啱崛起時，已經明白依個道理。

只可惜喺 HiFiTracks 結業後，要買香港/華語歌手嘅 Hi-res file，要「翻山涉水」去外國網站（例如 Mora、Qobuz）先買到，真係諷刺。慶幸依家串流都畀到同買 Hi-res file 基本上相同質素嘅 Hi-res 音質，都可以接受嘅。至於咁樣比較完之後會唔會話唔買 CD 呢？咁又唔會，始終CD 現時嘅價值仲同時係作為收藏品，依點喺 file 無可替代。