今日去咗尖沙咀方浪 showroom 試聽瑞士 Airplain 嘅新喇叭 five。依款雖然係佢哋最細嘅喇叭，體積有如家庭影院組合中嘅長條型坐地式喇叭，但憑著使用高性能單元及 DSP 控制，令佢可以發揮有如八寸低音單元二路分音喇叭嘅效果。初時見到佢個樣，仲要有個刺繡喇叭面網，以為佢係賣樣多過賣聲嘅 lifestyle 喇叭。但當方浪主事人 Kent Poon 喺依對喇叭上播放 drum solo 時，佢嘅聲音效果令我都有點震驚，因為聲音嘅速度、響度、密度都超越我對依個體積喇叭嘅想像。佢解釋因為 five 嘅四隻 Purifi Audio 四寸低音單元都會即時監測佢哋嘅運作狀態，確保佢哋完全同步運作，而且可以保障佢哋喺最低失真嘅運作範圍，就好似划艇咁，只要各個單元完全同步運作，就可以避免相位失真，而又提升到音壓。但喺被動式喇叭上面，要確保多個單元完全同步幾乎不可能，而喺 DSP 主動式喇叭上，就可以準確控制每個單元嘅延遲，做到完全同步。

佢嘅高音單元亦相當有睇頭。five 採用由 Airplain 研發嘅 ap-AMT-M2 氣動高音單元，其最特別之處係運作頻率範圍從 800 hz 到 24000 hz，比一般氣動高音延伸到更低頻率，亦涵蓋人耳最敏感嘅中高頻段，從而令聲音更線性。本身氣動高音嘅特性係聲音會十分開揚及輕鬆，而當佢嘅中高頻都同樣由氣動單元發出，加上中低音單元都係十分爽快時，令佢全頻都可以發揮出平時通常喺大喇叭先會聽到嘅從容感。

five 預計香港賣街價接近二十萬，對於依個體型嘅喇叭嚟講霎時間會覺得好貴，但考慮到佢已經整合擴音機及 DSP 房間處理功能，又可以慳返一堆線材成本，加上音質的確拍得住體型比佢大一截嘅喇叭，喺依家 Hi-end 音響定價越來越離地嘅年代，佢嘅價錢就突然變得相當合理。