最近 Lumin 嘅 Firmware 20.0 版本入面加入咗 QRONO d2a 模式，可以為任何非 MQA 制式嘅 PCM 音樂加入 MQA 嘅音色，可以理解依個係 DAC digital filter 嘅一種。

根據 Lumin 廠方所講，Lumin 預設嘅 DAC filter 係 Linear Phase，同 QRONO d2a 比又有咩唔同呢？我揀咗福山雅治嘅”Midnight Blue Train” 嚟做比較，依隻歌開頭係一小段結他，加一段清唱。喺依段音樂之中，開啟 QRONO d2a 嘅分別都幾明顯，感覺到聲音嘅稜角變得圓潤咗，但同時間聲音嘅立體感及對比度又會削弱咗。

不過喺播放其他歌曲，例如 Aimer 嘅歌時，開咗 QRONO d2a 又會覺得順耳啲，冇咁過份刺激。好彩依個係選項，如果唔鍾意的話，喺”MQA Mode” 揀返其他模式就會變返本來嘅 Linear Phase。當然我明白有啲用家會覺得 QRONO d2a 模式好聽啲，其實都冇問題，畢竟唔同人嘅喜好都唔同。而儘量提供選擇，希望滿足唔同人嘅喜好，相信亦係 Lumin 點解要畀用家可以自己揀開依個模式嘅原意。