大概一年前左右，我整咗個音響升級嘅 wish list，其中黑膠部分嘅選擇就係 Parasound JC3+。我揀依部機嘅時候我並冇認真試聽過，純粹只係略為睇過吓啲介紹，而且價錢又係我可以接受嘅範圍就揀咗佢。喺依一年間，我先升級咗喇叭同串流前級，而唱頭放大器就成為咗最後嘅拼圖。早前得知 V8 HiFi 有得試 JC3+，而且仲可以配合我依家用緊嘅 Hana ML 唱頭試聽，襯依家仲得閒就抽時間去聽吓，然後發現佢畀到我嘅嘢比預期中多…

今次試聽嘅碟範圍非常廣泛，從1960 年嘅早期立體聲錄音到近一兩年嘅新碟都有。我覺得 JC3+ 最迷人嘅地方係佢嘅聲音非常溫潤、飽滿，但因為佢嘅背景相當寧靜，令聲音嘅細節仍然會相當豐富，甚至令我可以感受到音響評論中間中會出現，但又相當抽像嘅用字：「聲音有感情」。依種聲音中嘅「感情」，係源於聲音嘅分離度夠高，背景夠寧靜，而且聲音瞬變速度夠快，唔會拖泥帶水，可以將音樂中嘅微動態變化，包括各種人聲及樂器各自不同嘅音色厚度，清楚表達到出嚟。

之後返去用本身嘅唱頭放大器聽返頭先聽過嘅碟，我覺得最主要嘅差距係整個音場冇咁立體，而且可能因為我用緊果部欠缺精細嘅負載阻抗控制，高頻聽落就有啲過份突兀。

整體嚟講 JC3+ 都係好滿足到我嘅需求，起碼當初揀佢入 wish list 係正確，而且以其價錢嚟講亦係頗為吸引。但近年亦有啲新出嘅唱頭放大器喺相若價位之下有極高水準表現，所以都係得閒試多幾部再聽吓有咩分別先。