2025 視聽展終於完滿結束。今年我嘅角色有少少唔同，幫手擺咗兩日檔，最主要係想從另一個角度睇吓現時香港音響市道嘅情況。首先依家嘅市道又未算話真係太差，起碼啲人仍然係會買嘢，只係好多時要深思熟慮後有promo 先買。即使視聽展主要都係街客多，但亦見到多咗booth (主要係大陸嘅booth) 想藉機會去搵香港或者海外嘅經銷，有啲產品對街客都吸引，但有啲就好明顯係去錯地方擺show😆而且今年嘅海外參觀者數量似乎比預期中多，見到有班泰國人，亦有日本人。

另外想講嘅係好多人都覺得近年視聽展嘅散貨場感覺強咗，因為少咗代理/廠商直接擺檔，多咗舖頭擺檔。但我就估計有兩個原因，第一係啲主流牌子marketing budget 少咗，有零售商願意畀啲代理嚟夾何樂而不為。第二係會展舊翼 hall 3 現時已經用盡空間，要再加大型 booth 已經十分困難，再開多個hall 又未必夠booth 填滿空間。整體嚟講今年嘅散貨氣息同2021 年果屆比已經係淡咗好多。

至於今年我又買咗啲咩呢？今年真心係近年買得最少嘢嘅一年，使咗五百幾蚊。最抵嘅碟就當然係環球booth 一舊水隻嘅陳慧嫻SHM-SACD，好耐冇試過依種買嘢要搶嘅情況😂😂另外又喺發記見到之前想買但厭貴冇買嘅黃劍文7寸single，最後講到個靚價成交。有趣嘅係搵到陳蕾士嘅古箏演奏專輯，冇錯，就係「聽陳蕾士的琴箏」果個陳蕾士，就即管買嚟感受吓「他的寬袖一揮，萬籟就醒了過來」嘅感覺。另外亦見到繼年頭 CanJam 後再嚟香港參展嘅原道，佢哋最近出咗條小型 USB DAC，雖然只有一個 3.5mm 輸出，但推 IE800 都有辦有眼，最重要係佢居然只係買 $60 蚊港紙，wtf?? 依個應該係今年視聽展最驚喜嘅產品之一。

至於係各間房嘅表現，講真，我都唔想評價太多。真係落手setup 過就會明會場限制太多，唔爛聲已經當贏。但亦有啲想特別讚吓 Audio Technica、TAD 同銀聲嘅房。Audio Technica 間房勝在揀歌揀得有趣，除咗啲傳統發燒碟之外，仲有揀好多流行曲嘅膠嚟播，舊嘅有竹內瑪利亞、Rick Ashley，新嘅有 Aimer、星街，個 range 可以咁闊的確係好開心。

而TAD 間房就好玩在佢每日臨收場前都會有DJ 用套靚音響現場打碟，依種做法之前喺啲外國音響展有見過，但香港應該都係第一次。雖然我覺得 TAD 喇叭嘅聲音特性其實唔係太夾玩依樣嘢，主要係低音嘅punchiness 唔夠，但會願意玩依啲傳統發燒友好大機會唔鍾意嘅嘢實在值得鼓勵。

銀聲間房最impressed 係對 Klipsch La Scala。依對喇叭早在 1963 年推出，依家賣緊嘅設計雖然已經係第六代產品，但整體設計都係同第一代相差無幾。之前喺 Showroom 聽過，可能因為當時啱啱開箱冇耐，加上空間對依隻喇叭嚟講太細，聽落都係有種舊式喇叭嘅殘缺感。但去到視聽展大房聽，我就覺得好咗好多。首先今次佢哋加咗隻同廠 subwoofer，直接解決咗 La Scala 低頻延伸不足嘅問題。而且對喇叭煲咗一段時間後，聲音從容同開揚咗好多，令黑膠訊源果種天生就好「放」嘅聲音特性特別強烈。另外會展大房本身回音問題頗嚴重，好多間都會明顯聽到聲音有唔正常嘅拖尾。雖然銀聲佢哋冇特別做聲學處理，但由於 La Scala 嘅號角單元特性，令佢嘅聲音可以少咗受反射聲影響，聽落嘅聲音清晰度比某啲貴好多嘅系統更好。