早幾日去咗 Feversound 搞嘅 JPLAY VS Roon 測試會，試後有啲驚訝一個 streamer remote app 都可以對聲音有明顯嘅影響。所以都有啲興趣喺自己系統上面試吓係咪真係有分別呢？因為我就唔用 Roon，用 LUMIN 原裝嘅遙控 app。頭先裝咗個 JPLAY 試吓，一裝好已經即刻搵到部 LUMIN P1 同埋 MinimServer 出嚟。操作介面有啲似 Roon，同樣可以將串流平台上嘅音樂及本地伺服器上嘅音樂喺同一個畫面顯示曬。整體而言我認為比 LUMIN 嘅操作介面更先進。遺憾係 JPLAY 仍然欠缺隨機播放所有歌曲或者所有專輯功能，有啲可惜，因為呢一個功能其實幾方便。

係時候講吓兩者喺音質上嘅分別。聽落兩者嘅分別係明顯嘅，但個標題都講得好清楚，改變唔等於改善。JPLAY 嘅音色明顯會比較飽滿啲，驟耳聽落會覺得聲音會有力咗同密度高咗。但同 LUMIN 自己隻 app 比較，聲音嘅細節會略為削減，而且音場結像會鬆咗少少。咁嘅情況下，我唔覺得依個係正面嘅改善。當然，每個人嘅喜好都唔同、每部機嘅情況又唔同，反正 JPLAY 有十四日免費試用，試咗先冇壞。