今日連跑兩場show。首先下晝去咗方浪音響舉辦嘅 Devialet Astra 示範會，Astra 係 Devialet 嘅全新旗艦擴音機，同上代 Expert Pro 嘅最大分別，係單機輸出功率更高，而且採用新一代專利 ADH 放大技術，透過提升採樣率令聲音重播更準確。而且 Astra 進一步降低輸出阻抗，令喇叭控制力更上層樓。現場亦分享咗使用唔同訊源，例如 Grimm MU1 同軸駁 Astra、MU2 模擬駁 Astra 及播黑膠嘅分別。今年正值方浪音響十五週年，其主理人 Kent Poon 亦分享咗十五年來嘅種種點滴，例如引入及推廣 Devialet 嘅經歷，獲益良多。

Devialet 個 event 完咗又即刻去咗 B&W Experience Shop 參加 FeverSound 搞嘅 Marantz 10 示範會。依場 show 有啲特別，因為特別有個環節比較吓 Roon 同 JPlay 嘅分別。JPlay 可以理解為一個發燒取向嘅 UPnP server 連控制 app，個人嚟講係比較喜歡 Jplay 嘅效果，最主要好處係中頻會比較飽滿，相對之下 Roon 嘅聲音就乾澀啲。不過依樣嘢就好視乎個人口味，起碼其他參與者喜歡 Roon 嘅比例都係比 JPlay 高。