本身用緊 Panasonic UB820，都用得幾開心，但發現少部份 UHD BD 會有相容性問題，例如 Bob James 隻 Feel Like Making Live 喺選擇 PCM 聲軌時會十分 lag 無法正常播放，加上將 HDMI Audio 接駁到 Lumin P1 時，會無法將多聲道聲軌 downmix 去兩聲道輸出，令播放電影時完全冇對白聲，所以就有啲想換機嘅念頭。考慮到我已經將手上所有 BD / UHD BD rip 入硬碟儲存，我其實可以買部已越獄嘅 UHD BD 機或者影片播放器就得。正路的話，選擇都有好多，但我依啲鍾意劍走偏鋒嘅玩家，就喺二手市場用個平得有啲意外嘅價錢買咗部偏門，甚至係邪門嘅機：魅視 M9708。

點解會係邪門呢？因為佢係一部縫合怪，使用「參考」Pioneer UDP-LX800 嘅底版，但就移除光碟機，跟機嘅遙控器係Pioneer 原裝，但使用嘅系統卻係介面上「借鑑」GIEC 嘅「高清先生」系統，硬體上又用上線性供電及CNC 一體化機殼，成部機根本就係四不像嘅山寨怪物。

雖然操作介面醜到極點，但運作起來都幾爽快，播放在 USB SSD 嘅 UHD BD 及 BD 備份檔，速度比 UB820 播碟明顯快一截。畫質方面，播放 UHD BD 時，M9708 我覺得會比 UB820 幼細啲，畫面嘅深度感好似明顯啲。比較大分別嘅係音質方面，M9708 喺播放音樂片段時聲音嘅立體感及層次感明顯比 UB820 好。但唔知係咪 M9708 個「高畫質先生」系統有問題，播放 24bit 聲軌時只能以 16bit 輸出，就算重設後調過唔同選項都係一樣，依方面就要同間廠果度跟進。

後來試咗幾個駁法睇吓，首先係同軸輸出，成功出到24bit，但會明顯細聲好多。之後試吓唔做影音分家，先用HDMI 駁 Lumin P1，再由 P1 駁返電視，搞掂，成功出到 24bit，而且音壓亦正常，畫質方面，目測同直入電視分別唔大。

第二個問題係佢辨識唔到隻 8TB 硬碟，不論係插喺機背定係側邊嘅 USB 頭，前面板都見到 “EXT” 字樣，但就係無法喺「視頻」頁面見到隻硬碟。後來我睇返 Pioneer LX800 嘅說明書，佢就話只支援最多 2TB 嘅硬碟，咁睇嚟係佢只支援 MBR 分割表而唔支援 GPT 分割表，因為 MBR 只支援到 2TB 嘅硬碟。結果我就搵咗隻舊嘅硬碟，轉做 MBR 再𠝹個 2TB 嘅分區，搞掂，即刻食到。似乎長遠都要買返隻 switch 畀佢駁返上網絡（因為依家唔夠 LAN 頭），再將隻硬碟插落電腦share 出嚟先得。

本身係諗住同之前用緊嘅 UB820 比較，但太心急，改完全區就賣咗，所以就同屋企部 UB450（換咗 CAS Workshop 線性電）做個比較。畫面方面，我睇咗 UHD BD 同 BD，覺得分別又唔算好大，細到係可以忽略嘅程度。聲音方面就比較明顯，UB450 低頻聽落量感多啲，但層次感明顯較差，M9708 上可以聽到嘅聲音層次喺 UB450 上就有啲矇。但講真，考慮到 M9708 本身都係想同啲旗艦級藍光機做比較，可能遲啲有機會搵部 UB9000 比較先得😆