早前聽到 KEF 話出條單體 Soundbar XIO 賣到萬七蚊，真係有啲驚訝。考慮到 KEF 近年嘅一體式串流喇叭喺非發燒友市場頗成功，都有諗過係咪賣樣多過賣聲，純粹為咗賣畀注重外觀嘅大眾用家呢？但今日去 KEF Music Gallery 試聽後，就發現係我錯。

講外觀，XIO 的確係做得靚同有高級感，精細嘅布面網配合金屬飾面，望落雖然冇 B&O 咁豪華，但設計上我會覺得係值依個價。講體積，闊度及高度同其他有超低音喇叭嘅soundbar 差唔多，最多都係深少少，而個深度就源於佢採用來自同廠超低音嘅背對背低音單元設計。

講聲的話，大部分 soundbar 嘅死穴係聽歌，普遍而言都係又乾、又薄、又散，就算係某電視廠嘅萬元級旗艦，聽歌我認為都係連三千蚊嘅一體式串流喇叭都不如。但 XIO 嘅表現好有驚喜，使用只用左右聲道嘅 direct mode，雖然音場嘅闊度受 soundbar 長度限制，但居然可以呈現到音場嘅深度。如果係用會自動將聲音分配去其他聲道喇叭嘅 default mode，更加可以做到從喇叭正面扇型向後伸展嘅闊而深音場，依點完全係得益於 DSP 技術進步帶來嘅優勢。

但 DSP 唔係萬能，要做到飽滿、細膩嘅聲音，就係喇叭單元、箱體設計同擴音線路嘅功勞，依點亦係 XIO 最煞食嘅地方。播放音樂時，佢嘅聲音密度好高、好飽滿，而且聲音嘅細節頗豐富，聽落接近 LSX 嘅水準。雖然喺大音壓下嘅聲音冇 LSX 咁乾淨，但考慮到咁細嘅箱體有咁多單元喺大音壓下發聲會承受好大嘅壓力，而且該音量係我用大喇叭聽都會覺得大聲嘅程度，依個表現已經比幾乎所有 soundbar 優秀。低頻嘅下潛力雖然受到單元尺寸物理限制，但能量感相當驚人，喺大音壓下居然做到震梳化嘅效果。整體嚟講我之前淨係喺一款單體 soundbar 聽過依個水準嘅聲音表現，就係 Sennheiser AMBEO Max，但 AMBEO Max 價錢更貴，體積仲要大好多。

至於比較多人著重嘅多聲道表現，XIO 我覺得都係十分有驚喜，喺恰當嘅環境下，甚至同有實體後置嘅 soundbar 有得 fight。我先喺面積比普遍家居客廳大好多嘅大房試音室試聽喺極限情況下嘅效果。依間房不但冇側牆同後牆反射，甚至連天花都因為採用通窿設計而做唔到有效嘅反射。但喺如此不利於 soundbar 嘅環境下，音場仍然可以好似有個圓罩咁包住坐位同 XIO 之間嘅位置，同時聲音嘅密度亦足夠。

之後去咗試音室外接近一般家居環境嘅空間，依個位置有平滑嘅天花，而且聆聽位置接近後牆，只係側牆位置比較遠。喺依個空間之下，環繞聲效果就非常強烈。天花聲道及後方環繞聲嘅包圍感極度明顯同立體，而且聲音亦唔含糊，依個效果比某啲我試過有實體後置嘅 soundbar 仲要好。側環繞聲嘅效果就因為離側牆較遠，相對之下就弱少少，但前側及前面上方環繞聲嘅效果唔錯，明顯聽到音場又大又闊嘅效果。慶幸 KEF 嘅代表話遲啲會有軟件升級，可以連接 LSX 系列做環繞聲喇叭，咁的話就可以解決埋冇側牆/後牆作反射嘅問題。

另一個我對 XIO 好滿意嘅係低頻表現，同之前聽歌嘅表現類似，雖然下潛力受限，但能量感強勁，非常結實同爽快，唔會有好多 soundbar 隻超低音質素良莠不齊令到低頻又浮、又散、又慢嘅問題。加入 KC62 超低音後，低頻量感唔係增加好多，但下潛力同層次感明顯有改善，最重要係低頻嘅速度不減，以非主打發燒友市場嘅產品嚟講，依種主打快、狠、準而唔係一味多 bass、boom boom boom 嘅聲音取向的確十分難得。

講真，我以前都對高價 soundbar 有啲質疑，覺得去到接近二萬蚊，不如買套「蛋仔」5.1 衛星喇叭組合夾 AV Amp 好過。但自從三年前聽過某位用緊 KEF「蛋仔」喇叭 HTS2001 嘅朋友換咗韓國某電視廠嘅萬元級旗艦 soundbar 後睇戲效果更好，就令我驚歎科技進步對音響發展都有好大影響。如今終於等到 KEF 加入 soundbar 戰團，價錢雖然唔平，但交足功課，對想儘量簡化系統，要靚仔，而又想要有一定音質水準嘅玩家嚟講，真心值得試吓先再決定。