相隔多時再去米樂聽 MK 西裝，感覺依然好好。今次行到 9.6.6，配合 Trinnov WaveForming 技術，雖然我只能坐喺側邊位，但全頻定位同層次感都好好，即使坐到好接近右邊 Surround 喇叭，仍然可以聽到左邊嘅 surround 效果係非常清晰同飽滿。而且低頻嘅速度、層次感、衝擊力都係我聽過最好嘅效果之一，非常犀利。

另外SIM2 嘅新款「入門」機 X80 表現亦幾有驚喜，畫面嘅色彩飽滿度、層次感、立體感、亮度及黑位都做得非常好，投射落170吋銀幕都可以做到有如 OLED 嘅亮麗畫面。雖然 RGB Laser 都係無法完全解決彩虹效應，但已經比其他方式有所改善。而且另一個有驚喜嘅係佢嘅體積非常細，而且投影距離幾短，入屋程度比傳統設計嘅投影機高得多，但畫質又明顯超越近年嘅中國牌子 lifestyle 向產品，50k 左右嘅價錢當然唔係平，但以 SIM2 嚟講係超值。