我遲咗五年先買 Sony 55X9500H

我遲咗五年先買 Sony 55X9500H。

我都講話買部大電視講咗好耐。之前淘寶買咗個坐地電視架，但買咩電視好都諗咗好耐。最初諗住買部 48~50 吋嘅電視就算，但後來度一度兩隻喇叭之間嘅位置，原來啱啱好放得落 55 吋，考慮到我嘅觀看距離有大概 1.8~1.9 米，咁唔買 55吋都對自己唔住啦😗最初諗住用一萬頭買 OLED，但問題係我每星期用依部機嘅時間都係得少過十小時，而且更大鑊嘅係如果我買行貨全新機的話，代理果邊都係唔會幫我裝上坐地架上面，所以不如都係平平哋買部二手高階機會更著數。做咗少少 Research 就決定揀 Sony 喺 2020 年推出嘅高階 LCD X9500H。講規格佢仍然打得，有 full array local dimming，HDR 亮度亦能上到 1000 nits，而且 Android 10 系統亦夠流暢同冇相容性問題，最重要係 Sony 嘅影像處理真係好好，依個價錢買部全新機冇可能會靚過佢。

依部機我喺 Carousell 上嘅二手電視舖搵到，賣$3400。間舖服務好好，任check，第一部開出嚟見到mon 內有粒塵，佢就即刻攞多部出嚟，好彩依部冇事，即刻課金。佢仲好貼心提醒安裝上架時唔好拆走保護螢幕嘅發泡膠，裝好後先拆走，又送埋本身部機冇，但冇咗就上唔到架嘅螺絲母。

一個人攞咁大部電視，難題係點發力搬起部機。雖然佢其實係輕身過隻 ATC SCM20ASL 喇叭，但由於佢面積大，加上喺我嘅臂長可觸及嘅範圍內好難搵到恰當嘅發力點，所以好辛苦。不過最難係將部機擺上坐地腳架果吓，因為我要將部機抬高到心口嘅位置，發力就變得十分困難，好彩試咗幾次都成功。搞咗陣再拆走包裝著機，燈凳，成功著機冇問題。

用咗幾個鐘執返好個位，終於可以好好享受部 Sony X9500H 電視嘅效果。依部機嘅畫質可以話係贏曬之前部 Samsung M8，最主要係暗位層次感豐富好多，唔會有「死黑」問題。而同屋企部 Panasonic GX800 比，黑位亦實淨好多。操作上嘅流暢度其實同 Chromecast Google TV 差唔多，都係有少少 lag 但可以接受。頭先最嘥時間嘅其實係清潔螢幕，因為間二手舖用啲唔知咩清潔劑抹螢幕，結果搞到畫面有層油喺面。我用冇酒精嘅 BB 濕紙巾慢慢抹濕，再用面紙抹乾，反覆抹咗幾次先大致上完全清除油跡，望落畫面都通透啲。

不過，原來舊嘅 HDMI 線真係會有機會用唔到 HDMI ARC。本身我用緊條 Wireworld 嘅舊款 HDMI 線，攞嚟駁影碟機播 4K/60p 都冇問題，但駁落部 Sony X9500H 去 Lumin P1 行 HDMI ARC 就係咁斷聲，即使嘗試根據網上教學，熄咗影碟機嘅 HDMI CEC 及電視嘅 RS232 控制功能都冇用。後來醒起早前出席 Feversound 嘅活動有條 P&O HiFi 送嘅 Bridgee XIN Ultra High Speed HDMI 線，即刻攞嚟試吓，一換咗之後就完全冇事，睇咗集 The Last of Us 都好穩定冇斷聲，而且音質都幾好，聲音細節同層次感比預期中豐富。如果想平平哋（2M 唔使三舊水）搵條穩陣嘅 HDMI 線，依條值得考慮。